Fluch der Karibik
| Filmdate | |
|---|---|
| Dütsche Titel | Fluch der Karibik |
| Originaltitel | Pirates of the Caribbean: The Curse of the Black Pearl |
| Produktionsland | USA |
| Originalsprooch | Englisch |
| Erschiinigsjoor | 2003 |
| Lengi | 137:13 Minute |
| Altersfreigoob | FSK 12 |
| Stab | |
| Regie | Gore Verbinski |
| Dräibuech | Ted Elliot, Terry Rossio, Stuart Beattie, Jay Wolpert |
| Produktion | Jerry Bruckheimer |
| Muusig | Klaus Badelt |
| Kamera | Dariusz Wolski |
| Schnitt | Stephen Rivkin, Arthur Schmidt, Craig Wood |
| Bsetzig | |
| |
| Dialäkt: Bärndütsch |
De Pirateföum Fluch der Karibik us de Disney-Studios esch met öber 6 Millione Kinobsuecher in Dütschland de viertgröschti Publikomserfoug vom Johr 2003 in Dütschland gsi. De Föum basiert lose of de Handlig vode Attraktion "Pirates of the Caribbean" i de Disney-Freiziitpärk. För 2006 ond 2007 send zwöi Fortsetzige plant.
Handlig
[ändere | Quälltäxt bearbeite]Es änglisches Scheff fent im Meer de Will Turner (Orlando Bloom) as 10-jährige Bueb triibe. D Elisabeth Swann (Keira Knightley), Tochter vom änglische Gouverneurs het gseh dass dä Bueb es Goldigs Medaillon ume Haus treit wo e Totechopf abböudet esch. Si nemmt ehm das Medaillon ab wöu si beförchtet dass dä Bueb e Pirat esch ond wot ehn so schötze.
Acht Johr spöter schaffet de Will Turner als Waffeschmed, ou för e Vater vo de Elisabeth. Ei Tag chont de Jack Sparrow (Johnny Depp) of die Insle wo die 2 läbe, of Port Royal. Det wot är sech es Scheff bsorge. Er cha d Elisabeth usem Wasser rette noch dem si Onmächtig dör nes Korsett d Feschtmuur is Meer gstörtzt esch. De Commodore Norrington (Jack Davenport) verhaftet ne aber chorz druf wöu är ne as Pirat ertappt het. I dere Nacht werd d Insle Port Royal vo de Piratemannschaft vo de Black Pearl ufgsuecht ond agreffe. Sie entfüere d Elisabeth. Ofem Scheff get si de Name Elisabeth Turner ah, wöu si meint d Pirate heige si entfüert wöu si d Tochter vom Couverneur esch. Die wei jedoch nome s Medaillon.
De Will Turner befreit am nöchschte Tag de Jack Sparrow usem Gfängis, wöu de Jack versproche het dass är im Will höuft met sinne Piratekönntniss d Elisabeth z fende. Met eme Tüschigsmanöver chöi si d Interceptor, s schnöuschte Scheff vo de Britische Flotte kapere ond möche sech so ofe Wäg.
Si möche sech ofe Wäg noch Tortuga, e beröchtigti Piratestadt, det wei si e Mannschaft för ehres Scheff fende. Ofem Wäg erfahrt de Will vom Jack dass de Vater vom Will e Pirat gseh esch ond onderem Kommando vom Jack of de Black Pearl dienet het. Noch ehre Meuterei, agfüehrt vo sim erschte Offizier Barbossa (Geoffrey Rush), esch de Jack of ere einsame Insle usgsetzt worde, met ned meh aus einere Pischtole met nor eim Schuss. Während d Mannschaft vo de Black Pearl e Cheschte met verfluechtem Aztekegold gstohle het, het de Jack met Höuf fo Rumschmoggler chönne vo de Insle flieh. D Besatzig vo de Black Pearl esch jedoch met eme Alte Fluech vo de Azteke beleit gseh, wo si zwor onstärblech gmacht, aber im Mondliecht zo Skeltette mutiere loht.
Die Fluech cha nome broche wärde, wenn alli Medaillons wo ide True gseh se weder zroggleit wärde. Zuesätzlech möi die, wo es Gouldstöck gstohle hei, e Bluetpris zahle. Vo de Pirate vo de Black Pearl esch die Bluetpris scho zaut worde, met Usnahm vom Vater vom Will Turner, em Wiliam Turner Sr. Wöu dä aber nömme erreichbar esch bruche si s Bluet vomene Nochfahr vo ehm. Wöu d Elisabeth sech as Elisabeth Turner usgä het ond si s Medaillon bi sech treit, gloube d Pirate, dass si i ehre de Nochfahr vom William Turner Sr. gfonde hei. De Jack Weiss dass de Will de Sohn vom William Turner esch setzt alles dra, sini Black Pearl weder iizhole.
Währenddesse het d Black Pearl d Isla de Muerta, wo d Schatzcheschte glageret esch, erreicht. Met de Elisabeth söu eze de fählend Bluetpris zaut wärde. Si schnide ehre d Hand uf ond merke chorz druf dass d Elisabeth schinbar kei Nachfahr vom William Turner Sr. esch. Sie chöi de Fluech ned uflöse. Mettlerwile hei ou de Will Turner ond de Jack Sparrow d Piratehöhle erreicht. Im Will glengts d Elisabeth z rette ond är cha met ehre flieh. De Jack aber werd vo de Pirate feschtgno, si näi ne met ofd Black Pearl ond näi so d Verfougig ofd Interceptor uf.
Es chont zonere grosse Seeschlacht, d Interceptor werd zerstört ond ehri Besatzig, sowie de Will Turner ond d Elisabet Swann wärde gfange gno. Nochdem de Will Turner ide Pirate offebart het, dass är de Sohn vom William Turner Sr. esch, setzt de Barbossa de Jack, zäme met de Elisabeth of de Insle us wo de Jack vorär scho verbannt worde esch. D Elisabeth cha d Dauntless, es britisches Scheff wo de Commodore Norrington Kapitän esch, of sech ufmerksam z mache. D Elisabeth ond de Jack überrede de Commodore d Verfougig ofd Black Pearl ufznä. De Norrington weiss allerdengs ned dassd Besatzig vo de Black Pearl verfluecht esch ond ned cha stärbe.
Bi de Isla de Muerta iitroffe, öberzügt de Jack Sparrow de Commodore, dass är zor Höhli ruedere wärdi ond d Pirate dezue öberredi usezcho, ond si so ine Hinterhalt lockt. I de Höhli acho, verzöut de Jack de Pirate aber vom Hinterhalt und gwönnt so de Barbosse för sine Plan, d Dauntless z kapere ond as zwöits scheff för sech z nä. De Jack säuber wörd de weder de Kapitän vo de Black Pearl wärde. D Pirate göi auso zo de Dauntless, ond wöu si onstärblech se göi si onbemerkt onder Wasser. Es get es Gfächt met de Soudate vo de britsche Marine. Underdesse befreit de Jack i de Höhli de Will ond foht e Fächtkampf met em Barbossa ah. De Jack het allerdengs vorhäne äbefaus es Medaillon us de True gstohle, ez se auso beidi onstärblech. Erst wo de Jack d Mönze met sim Bluet im Will zuerüehrt ond dä sini Mönze met sim Bluet id True keie loht cha de Jack met de einzige Chogle i sinere Pischtole woner för die Glägeheit ufgspart het, de Barbossa erschiesse. Wöu de fluech broche worde esch ond alli Pirate ez stärblech se, ergäi si sech of de Dauntless.
Zorg im Hafe vo Port Royal söu de Jack Sparrow för sini Verbräche ghänkt wärde, doch de Will Turner ond d Elisabeth Swann ermögleche im Jack ide legschte Sekonde d Flocht of d Black Pearl. Während de Will Turner ond d Elisabeth enand ehri Liebi gestöi, seglet de Jack als Käpten vo de Black Pearl us em Hafe.
Kritik
[ändere | Quälltäxt bearbeite]D Kritik esch positiv vo guet bes sehr guet usgfaue.
Uszeichnige
[ändere | Quälltäxt bearbeite]I 5 Kategorie (bescht Houptdartseller, beschts Make-Up, beschte Ton, beschte Tonschnett ond beschti Speziaueffekt) esch "Der Fluch der Karibik" före Oscar nominiert worde, jedoch leer usgange. De Johnny Depp hed för sini Darstellig aus Jack Sparrow veli Nominierige öbercho, aber nor eini gwonne, ond zwar die vode Schauspielergilde met em Screen Actors Guild Award.
Literatur
[ändere | Quälltäxt bearbeite]- Rebecca Hohlbein und Wolfgang Hohlbein: Fluch der Karibik. Der Roman zum ersten Kinofilm. 1. Auflage. Vgs, Köln 2006, ISBN 978-3-8025-3540-6, S. 251.
- Richard Platt und Glenn Dakin: Fluch der Karibik - Das große Piratenhandbuch. Eine Reise in die Welt des Jack Sparrow. 1. Auflage. Vgs, Köln 2007, ISBN 978-3-8025-3617-5, S. 93 (englisch: Pirates of the Caribbean - The Essential Guide. Übersetzt von Bettina Oder).
Weblink
[ändere | Quälltäxt bearbeite]
Commons: Fluch der Karibik – Sammlig vo Multimediadateie- Fluch der Karibik in dr Internet Movie Database
- Gsammleti Zytigskritike zue Fluch der Karibik uf Metacritic.com (änglisch)
- Presseschau uf film-zeit.de
|
Dä Artikel basiert uff ere fräie Übersetzig vum Artikel „Fluch_der_Karibik“ vu de dütsche Wikipedia. E Liste vu de Autore un Versione isch do z finde. |